العنود الجزء ١٢

هيفاء من الرعب غطت عينها وحست نفسها بحلم وفي هالوقت كان تركي يتأملها ويلاحظ شعرها الحريري منتشر حولينها مثل الهاله وطالعه مثل الحور بجمالها فتحت عينها ببطء وطاحت عينها بعينه مباشرة وهنا وقف الوقت والزمن وحسوا بخيط خفي متصل بينهم يجذبها له وقرت في عيونه مشاعر كثيرة ماعرفت تفسرها واخيراً تكلم تركي بصوت اجش:

هيــــفاء؟

هيفاء حست لسانها معقود وماتقدر تتكلم..فتكلم تركي ثاني مرة بتساؤل:انتي ليه تكرهيني..

هيفاء هزت راسها من غير ما تتكلم بطريقة غير مفهومه.

تركي بصوت اثقلته المشاعر: هيفاء ارجوك ..اتركي نواف ..

هيفاء رفرفت بعيونها وكأنها كانت بحلم والسحر انفك...تركي وهو يكمل:اتركي نواف..لاتتزوجينه..

هيفاء قامت من مكانها وهي زعلانه من نفسها انها سمحت لنفسها تنجرف ورا مشاعرها ومن الكلام اللي يقوله يعني معقوله انه كان يمثل عليها بس عشان تترك نواف..هيفاء وهي ناسية انها من غير غطا ولابسه بجاما ردت على تركي بقسوة: انت حقيــر و قاسي ومغرور ..و..و..وصرخت: انـــانـــــي!

كملت وصدرها يرتفع وينخفض من الانفعال:ماهقيت انك عشان تنفذ اللي براسك بتستخدم اكثر الوسائل المنحطه عشان توصل للي تبيه!

تركي تغيرت ملامحه الى الغضب وفز من السرير بحيث خلاها تتراجع بضع خطوات من الخوف..وهو يتكلم بقسوة:انتي بالذات اللي المفروض ماتتكلم عن الانانية..تعرفين ليه..لانك وحده طماعه ونواف ماوافقتي عليه الا عشان فلوسه..

هيفاء انصدمت من اللي يقوله لكن تركي تابع كلامه مو مهتم فيها: بس خلي في بالك اني مستحيل اخلي هالزواج يتم ولو فوق جثتي..

اتجهه للباب وافتحه علامة الطرد ..هيفاء سحبت رجولها سحب لانها كانت تحس بثقل فيها وكانت بس تبي توصل لغرفتها عشان تفرغ اللي فيها من حزن..تركي جرحها للمره الثانية لما وصفها بالطماعه وانها طمعانه بفلوسهم.مرت عليه من غير ماتطالعها وهو سكر الباب بهدوء وراها هيفاء وصلت لغرفتها وهناك دفنت وجهها بالمخده وقعدت تنتحب بصوت واطي ولاقدرت تنام ..شلون وكلامه لسه في بالها..هو ليه كذا قاسي معي انا ايش سويت له عشان يعملي كذا ،انبطحت على ظهرها وهي تناظر السقف..وتتذكر ذاك اليوم لما ابتسم للعنود بنعومه حست بالغيرة لانها ماقدرت تسحب منه هالابتسامه غمضت عينها ودموعها تنزل ساخنه على خدها..

العنود في ذاك الوقت كانت صاحيه مثل عادتها.. وهي متى ذاقت النوم تفكربمراره ..هي من عرفت فواز وهي ماعرفت طعم النوم..حاسه انها مختنقه وتبي تفضفض اللي بقلبها ..وقعدت تفكر بكلام الجوهره لما قالت انهم ناوين يخطبون لفواز..هذا دليل ثاني انه ماكان يحبني..تنهدت بضيق وزاحت غطا السرير عنها ومشت رايحه للشباك وهي تناظر القمر وضايعه بافكارها ..وتتمنى تلقى الحل لمشكلتها وتغادر هالديرة وتترك وراها كل شي صار لها فيها وتحاول تجمع حطام قلبها من جديد.

******************

في اليوم التالي كانت هيفاء لساتها صاحية ولما شافت ان الساعه صارت 7 الصبح قررت انها تنزل وتشوف لها شي تاكلها .بدلت ملابسها وحطت الغطا على راسها اول ماطلعت من الغرفة اسمعت صوت باب ينفتح من وراها التفتت الا هو تركي بكامل ملابسه الرسمية نزلت راسها ومشت من غير ماتقول شي وهو مشى وراها ويراقبها بهدوء دخلوا مع بعض المطبخ وهناك حصلوا ام فهد موجوده هيفاء حبت راس امها وقعدت على الكرسي تصب لنفسها نسكافي..بينما تركي يصبح على ام فهد اللي كانت مستغربه من وجوده:صباح الخير خالتي.

ام فهد:صباح النور يابعد عمري..الا انت متى جيت؟

تركي بابتسامه ماوصلت عينه:البارحه بالليل.؟

ام فهد:وعسا نمت براحه وما تعبت؟

تركي التفت على هيفاء وبصوت ناعم: براحــــــه تامه.

هيفاء اللون الاحمر زحف على وجهها بالكامل وغطت ونزلت وجهها..عم المكان السكوت ام فهد كانت تقرا الجريده وتركي كان ياكل بصمت وبتفكير..اما هيفاء كانت تحاول تهدي من خفقان قلبها وشاغله نفسها بشرب النسكافيه..رن تلفون هيفاء اللي قطع جو الهدوء وكان التليفون بينها وبين تركي اللي رفع عينه يشوف التليفون الا التلفيون مكتوب عليه (حبيبي) هيفاء خذت التلفون وطلعت للممر عشان تتكلم على راحتها.

هيفاء:هــــــلا نواف..

نواف بحنان:هلا والله بالغالية..

هيفاء تفكر بمرارة بالفرق بين الاخوين:اهلين وشخبارك؟

نواف بصوت ناعم:اشتقتلك!

هيفاء وهي تضحك بنعومه:ههههههههههه..والله؟

نواف :والله..وانتي ماشتقتيلي..

هيفاء كانت مستحيه تقوله ولما شافت تركي طالع من المطبخ..غيرت نبرتها للنعومه: نـــــواف..ليه ماتجي للندن؟

هنا تركي وقف في مكانه متظاهر انه قاعد يقرا البريد اللي على الطاوة بالممر..

نواف بأسف:والله ياحبيبتي ودي بس الله وكيلك تركي ماعطاني فرصة ارتاح فيها ما اخلص صفقه الا مطلعلي صفقه ثانيه..

هيفـــاء:خســــارة..لاني بصراحه مشتاقتلك..

تركي رفع راسه يطالعها بقسوة ونواف اللي كان منصدم منها هذي اول مرة هيفاء تكون جريئة معه: طيب ايش رايك انه انا اول ماحصل فرصة راح اجي للندن..اوكي؟

هيفاء:اوكي..يالله باي.

نواف:باي..

تركي قط اللي بايده وهو يبتسم بسخريه وطلع من الشقة..ام فهد طلعت من المطبخ وهي تكلم هيفاء:هيفاء يمه روحي قومي فهد خليه ينزل عشان يتفطر..

هيفاء:ان شالله يمه..

هيفاء طقت باب غرفة فهد وماحصلت رد افتحت الباب ودخلت الغرفة اللي كانت مظلمه اتجهت لفهد تقومه لما انتبهت للرسومات اللي كانت موضوعه على التسريحه قربت منها عشان تشوفها،فهد كان معروف انه فنان من يوم كان صغير ،رفعت الرسمات تشوفها الرسمه الاولى كان رسم اولي خلته وخذت الرسم الثاني وشافته راسم عيون وحده وملامحها ماكنت باينه لانه ماكملها لسه بس هو رسم عيونها بطريقه رائعه وكأنها تحمل مشاعر كثيرة..فجاءة انسحبت الرسمة من ايدها بعنف التفتت على فهد اللي كان معصب عليها:انتي وش قلة الادب اللي فيكي تخليك تفتشين باغراضي..

هيفاء بصدمه:بس قاعده اشوف..

قطع عليها كلامها بغضب :ولا كلمه..اطلعي برا لا اصكك بكف اللحين..

هيفاء حزنت من الكلام اللي قاله وبان هالشي بوجهها ،فهد تنهد وتعوذ من بليس:آسف ماكان قصدي..بس انتي تعرفين انه انا ماحب احد يفتش باغراضي..

هيفاء وهي منزله راسها:آسفه والله ماكان قصدي..

فهد وهو يحط ايده على كتفها بمرح: الا وش جاب القمر لغرفتي..؟

هيفاء تبتسم:جيت عشان امي تقولك انزل عشان تتفطر.

فهد وهو يأشر على خشمه: على هالخشم..بعد آمري..

هيفاء بمزح:ابي ساعه الماس..

فهد وهو يطردها:اشوفك ماخذتها جد اقول اطلعي برا..اطلعي برا

هيفاء طلعت وهي تضحك عليه:هههههههههههههه...

******************

العنود صحت من النوم وهي تحس بتعب رهيب قامت للحمام وخذت لها شاور سريع وراحت للتسريحه تجفف شعرها وهي تحس بالم فظيع يغزو جسمها لما خلصت وبدلت ملابسها نزلت تحت،وهي نازله شافت حمد كاشخ وقاعد يصفر..العنود استغربت منه هالكشخه..

حمد بمرح: صباح الخير..

العنود وهي رافعه حاجبها:صباح النور...

حمد:وش عندك تناظريني كذا؟

العنود:ولا شي بس وش عندك كاشخ اليوم؟

حمد:كيفي مزاج...طق براسي اليوم اكشخ عندك مانع؟

العنود وهي تنزل معاه: لا ماعندي مانع..

لما اوصلوا باسوا راس والدتهم وقعدوا على الطاوة عشان يتفطرون بس العنود ماشتهت تاكل فصبت لنفسها شاي وقعدت تشربه شوي الا حمد يسألها..

حمد:وين بتروحون اليوم..؟

العنود وهي تهز كتوفها:مادري يمكن نروح نجيب الاغراض اللي هيفاء حاجزتها من المحل..

حمد:امممممم..

العنود:ليـــــه تسأل؟

حمد:ولا شي بس كنت احسبك مورايحه لمكان كنت عزمتك على المطعم نروح نتغدى..

العنود استغربت: تعزمني...

حمد:ايــه

العنود:حمد انت فيك شي...لا انت اكيد فيك شي..

حمد وهو يضحك على شكل اخته:ههههههههههههه.. ليه وش فيها؟

العنود :لان هذي اول مرة تعزمني فيها لمكان..اجل فهد وينه؟

حمد مسك راسه:بلييييييس لا تجيبين طاريه.. 

العنود: وش السالفه؟

ام حمد باستغراب:هوو وشفيك على ولد خالك؟

حمد: مو انا اللي شفيني الا قولي هو وش اللي فيه،من كثر مايقابل فواز حالته النفسية تأثرت صارت نفسه شينه..

العنود نزلت عيونها للكوب

 بينما ام حمد:مسكين والله ..وانت ياحمد لازم تراعيه..

حمد:والله ان انا مراعيه..بس هو يقول ان فواز من يوم الحادث وهو متغير عليه ومايدري من ايش..

العنود رفعت راسها لامها وبعيونها رجاء:يمه الله يخليك خلينا نرجع للرياض..

ام حمد بصوت حازم:رجعنا لنفس السالفه..انا قلتلك لا يعني لا..

العنود برجاء:لييييييييه..

حمد:انتي من جدك..اللحين الناس كلها تتمنى تقعد وانتي تبين ترجعين..لا شكلك مانتي بصاحية..

العنود كانت بترد بس حست بلوعه فظيعه فمسكت بطنها وقامت تبي ترقى لغرفتها عشان تنبطح شوي وتريح..بس حتى لما انبطحت ماحست براحه وبدت تحس بالبرودة في اطرافها ..شوي الا راس مها يطل عليها من الباب..

مها بابتسامه:هااااي عنود..

العنود ردت عليها بابتسامه واهنه:هاي..

مها:ممكن استخدم تليفونك عشان اتصل على فهد يجي ياخذني..؟

العنود:ممكن؟

العنود عطتها التلفون وقعدت تراقبها وهي دق على الرقم وبعدين تحط التليفون على اذنها تنتظر رد..

فهد:الو؟

مها:هلا فهد..

فهد:هلا مهوي..

مها:فهد بغيتك تجي تاخذني من بيت عمتي..تقدر؟

فهد:خلاص خمس دقايق وبكون عندك..بس انتي ابرزي..

مها:اوكي..باي.

سكرت التلفون وحطته عالطاوله والتفت للعنود وشافتها مصفرة مها خافت من شكلها:عنوووود انتي فيك شي؟

العنود بابتسامة اطمئنان: ايه بس احس بلوعه..

مها :طيب انا بنزل تحت انطر فهد اخوي..تبين شي اجيبه لك؟

العنود هزت راسها :لا مشكوره حبيبتي..

اول ماطلعت مها من الغرفة الا التلفون يرن ردت العنود..

هيفاء:هاااااااااااااااي..تئبريني؟

العنود:هايات..

هيفاء:ها وينك؟

العنود:بالبيت...انتي وينك؟

هيفاء:بالبيت لكن اللحين بجيك..

العنود:بتجين مع فهد؟

هيفاء باستغراب:ليه اخوي فهد بيجيكم؟

العنود:ايه راح يجي ياخذ مهوي اختك..

هيفاء وهي تصارخ:وييييييي..طيب يالله باي ..بروح الحق عليه..

العنود سكرت منها وهي تضحك..قامت من مكانها عشان تستعد بس احتاجت انها تتمسك بالسرير لان صابها دوار عنيف بس لثواني..هزت راسها واتجهت للتسريحه عشان تحط شوية ميك اب وتجهز،بعد ماخلصت انزلت تحت وحصلت مها قاعده بالصاله تتابع التلفزيون راحت لها ..

العنود:يله مهوي قومي خلينا ننزل تحت ننطرهم برا..

مها قامت وطلعت معها وقعدوا على الكرسي الموجود برا العمارة يتفرجون على الرايح والجاي شوي الا سيارة رياضية توقف قدامهم وصوت هيفاء وفهد وهم يتناقرون داخل السيارة، نزلت هيفاء من السيارة ووجهها صاير احمر من العصبية وفهد نزل من وراها وهو منبه لوجود العنود يصرخ فيها :هذي آخر مرة تركبين فيها معاي..

العنود وهي مستغربه:شسالفه؟

فهد انتفظ لما سمع صوتها ولف عليها:هلا العنود..تصدقين اني ماشفتك.

العنود بهدوء:اهلين فهد..شخبارك؟

فهد وهو راجع للسيارة ويحاول يتجنبها:بخير الله يسلمك..يله مهوي..

هيفاء استغربت اللي صار بين اخوها والعنود التفتت على العنود وحست انها مو طبيعيه:العنود ايش فيكي؟

العنود:ولا شي.

هيفاء :طيب يله قومي خلينا نروح..

************************

في نفس الوقت في المستشفى كان فيه واحد معند لاياكل والجوهره تحاول فيه انه ياكل..

الجوهره بحزن:فواز والله حرام اللي تسويه في حالك..انت كذا بتموت..

فواز وبنظرة الم: ياريتني اموت ..

الجوهرة برعب:فوووووواز ايش اللي قاعد تقوله..

فواز صد عنها وهو يفكر انه خلاص حياته مالها معنى من غيرها ودامها بتصير لغيرها يتمنى الموت ولا يشوفها تروح لغيره..الجوهرة حبت تفرحه فحبت تقوله عن زيارتهم البارحه لبيت ام فهد..

الجوهرة:امس رحنا بيت ام فهد..

فواز وهو لسه صاد عنها:وخير ياطير..

الجوهره تكمل:وكانت عندهم ام حمد وبنتها..

فواز هنا الجوهرة استحوذت على كل انتباهه فواز التفت عليها وبنظرة غامضة:لا.. وش اخبارهم..؟

الجوهرة بخبث:الحمد الله..

فواز حس انه ماراح يقدر يسحب شي من اخته من غير مايفضح مشاعره فقال بالم: تدرين ان العنود مخطوبه لفهد..

الجوهره بهدوء:ادري ..

وعشان ترفع من معنويات اخوها شوي: بس احس انها مو عاجبها هالشي..

فواز وهو يحس بالامل:شـــلون..هي قالت لك شي؟

الجوهره:لا الا بالعكس البارحه كانت هاديه بس هيفاء اللي تدخلها بسوالفنا..كانوا يبوني اروح معاهم اليوم بس انا اعتذرت منهم عشان اجي لعندك..

فواز بعصبيه:ليه ماتروحين معاهم..روحي..

الجوهرة خافت من تغير اخوها:فواز شفيك..

فواز بتصميم:دقي عليهم وشوفي وينهم..وروحي لهم.

الجوهره بتردد:بس انا قلتهم اني ماراح اروح..

فواز بصوت منخفض: اقولك اتـــصلي لـــهم..وروحي لـــهم.

الجوهره خافت منه:اوكي..اوكي..حشا كلتني..

الجوهره طلعت التلفون ودقت على العنود عشان تشوف اهم وين..لحظات الا العنود معاها:الـــــو؟

الجوهره وعيونها على اخوها:السلام عليكم..

العنود:وعليكم السلام..

الجوهره:هلا العنود ماعرفتيني؟

فواز من سمعها تنطق باسمها وهو قلبه يدق بجنون وفي خاطره يتمنى ياخذ التلفون من ايد اخته بس عشان يسمع صوتها اللي يرد الروح..

العنود:هلا والله بالغاليه..شلونك؟

الجوهره بابتسامه:بخير الله يسلمك..انتي شلونك؟

العنود:الحمدالله..هاه عسا بس غيرتي رايك وقررتي تطلعين معانا..

الجوهره بتردد:اذا مافيه حرج؟

العنود:افا عليك لا حرج ولاشي الابالعكس هذي الساعه المباركه اللي عرفناك فيها..

الجوهره:تسلمين يالغاليه..اجل انتو وين عشان اجي لعندكم؟

العنود عطتها العنوان وقالت لها ان اول ماتوصل تدق عليها رنه عشان تطلع لها خذت الجوهره العنوان واتفقت معاها ومن بعدها ودعوا بعض وصكت التلفون.

التفت لاخوها اللي كان شارد الذهن:ياهوووو..

فواز التفت عليها:هاه عسى بتروحين لهم؟

الجوهره باستغراب مصطنع:اموت واعرف انت ليش مصمم اني اروح معاهم؟

فواز ارتبك:ولا شي بس مابيك تعبين نفسك معاي وابيك تستانسين..

الجوهره حزنت ان اخوها ماقال لها السبب الرئيسي لانها عارفه انه يبيها تروح معاهم بس عشان تجيب له طاريها واخبارها..

*************************

كان تركي بالمكتب ومركز على الاوراق اللي بين ايديه لما سمع طرق على الباب

طل ايلي من الباب:مرحبا تركي.

تركي هو مازال مركز على الاوراق:اهلين..

ايلي:تركي..عندك مكالمه..

تركي وهو مو منتبه:مشغول..

ايلي بتوتر:بس هيدا نواف..

تركي رفع راسه وهو مستغرب:نواف؟

ايلي هز راسه..تركي:طيب حول المكالمه..

ايلي حول المكالمة اللي استقبلها تركي:الـــــو؟

نواف:هلا تركي..

تركي ببرود:مرحبا..

نواف: شخبارك؟

تركي وهو حاس انه في مغزى ورى هالاتصال..بسخرية:تمـــــام..

نواف بتردد:تركي بغيت...اجي لندن؟

تركي ببرود:لا.

نواف بعصبية: ليـــــــــــــــه؟

تركي بقسوة:اولا عندك شغل..وثانيا مابيك تكون بقربها.

نواف عرف تركي مين يقصد فغضب من مقصده:اسمع ياتركي اذا حاولت تسويلها شي او قربت منها بسوي شي ماشفته.

تركي بسخرية:يعني ايش بتسوي؟

نواف بحقد:بخليها تحتقرك اكثر..انا سويتها مرة واقدر اسويها مرة ثانية..

نواف بعصبية:وانا ماعلي منك..اليوم انا جاي على اول طيارة للندن.

تركي بهدوء:هذا اذا قدرت تطلع من المطار..

نواف:.................

تركي بسخرية:من سكوتك اتبين انك عارف كلامي..انا اعرف ناس بالمطار اقدر اخليهم مايسمحون لك تركب الطيارة...وسلم على عمتي.

تركي صك الخط وهو معصب حاول انه يرجع للاوراق اللي كانت بين ايديه بس تركيزه كان متشتت قام ولبس الجاكيت .بيطلع يشمله شوية هوا ممكن ينفعه.

***********************

في نفس الوقت كانت هيفاء تقيس لها بدله عاجبتها عبارة عن بنطلون ضيق للركبة وفوقه بوت وبلوزه فضفاضه وضيقه من الخصر طلعت هيفاء من الغرفة عشان تشوفها العنود وتاخذ رايها.اول ماطلعت وشافتها العنود شهقت..

العنود:روووووووووعه ياهيوف...تجنن

هيفاء:والــــله؟

العنود:والله..لازم تاخذينها..

هيفاء:خلاص باخذها....بالمناسبة الجوهرة ماوصلت ؟

تو العنود بترد عليها الا تلفونها يرن رنه علامة ان الجوهرة وصلت.

ابتسمت العنود لهيفاء وقامت من مكانها متجهه لبوابة المحل عشان تشوفها الجوهرة بينما هيفاء خذت الملابس وراحت تحاسب..شوي الا العنود والجوهره داخلين المحل وهم يضحكون.

هفاء وهي تسلم على الجوهره:هلا حياتي..شلونك؟

الجوهره:بخير الله يسلمك..انتي انشالله بخير؟

هيفاء:بخيرالحمد الله..

العنود مسكت لها بدلة كانت مترددة تاخذها ولا لأ:لحظه ياهيفاء استني شكلي باخذ هالبدله.

هيفاء: اوكي خلاص انتي ادفعي فلوسها وانا استناك برا. 

التفتت على الجوهرة:تستنين معس برا ولا مع العنود.

الجوهرة بابتسامه:انا بتفرج شوي لغاية ما العنود تدفع.

هيفاء:اوكي.

طلعت هيفاء من المحل تستناهم الا بالصدفه شافت حمد مار وهو يعبث بالتلفون ومو منتبه لها قامت هيفاء ابتسمت بخبث وراحت وراه .

هيفاء :حمــــــــــد!

حمد وهو مخترع:حسبي الله على بليسك!

هيفاء وهي تضحك:هههههههههههههه..

حمد:تضحكين والله حركه سخيفه انها اللحين مشغول..

هيفاء بخبث :ماشوفك مشغول..

حمد:ههههههههه..والله ماقول الا الله يعين نواف عليك..

التفتت هيفاء للصوب الثاني من الشارع وانصدمت لما طاحت عينها في عيون تناظرها باحتقارشديد..

تركي انصدم لما شاف هيفاء واقفه مع واحد غريب وتضحك وتسولف معاه فحس بالاحتقار اتجاهها..اما بالنسبة لهيفاء اللي كانت مستغربه نظراته وحمد لما شاف ملامحها تغيرت لف صوب المكان اللي هي تطالعه:منو هذا ياهيفاء؟

هيفاء ببرود:هذا واحد مو مهم.

حمد :تبيني اروح واسنعه لك؟

هيفاء وهي تتخيل حمد يضرب تركي او العكس صحيح:ههههههههه..من جدك خله منك؟

التفتت هيفاء على تركي وماحصلته ..احمدت ربها انه راح تحس انه شوي بيقتلها على انها ماتدري ايش عملت،بس هو ايش يخصه فيها.

طلعت الجوهرة وهي ماسكه العنود تعنزلها وكانت العنود مصفرة وتحس بلوعه شديده وماتحس باطرافها ،هيفاء لما شافتها بهالشكل ارتاعت.

الجوهره:هيفاء الحقي العنود فجاءة طاحت وتقول انها تعبانه وماتحس برجولها.

حمد تحنحن:احححححم..وخروا عنها انا سيارتي قريبة من هنا ..امشي يالعنود..

قام ومسك العنود من خصرها وهو يعنز لها ومن الصوب الثاني كانت هيفاء تعنز لها :العنود ..شفيك ..بايش تحسين؟

العنود ماقدرت ترد تحس اذا ردت راح ترجع ..

...

ياترى ايش اللي بيحصل للعنود؟

وفواز ايش بتتوقعون راح يصير له بالايام اللي جايه؟

ونواف هل بيعصي تركي وبيجي للندن؟

وتركي ايش اخرتها مع هيفاء؟